اللهم صلي على وليك الحسين بن علي الشهيد ، السلام عليك يا أبا عبد الله الحسين ورحمة الله وبركاته
ذكرت قصيدة كنت قد سمعتها من قناة الفرات الفضائية قبل سنوات ، كلما ذكرتها انكسر قلبي
فأحببت أن أنقلها لمن لم يسمع أو يقرأ هذه القصيدة الرائعة للشاعر العراقي المرحوم الأستاذ رحيم المالكي
الذي اغتيل في العراق.
**** عتاب مع نهر الفرات *** إ شلون تجري أومايك أزرق يافرات .... وإنته ذنبك موذنب يفطر سمه
إ تسابقت بالطف على إحسين السيوف ... ومايك أول سهم في صدره انرّمه
وطاح أبو السجاد يم جرفك شهيد ... ابين سيفين العدا وسيف الضمه
وجان مايك أشـد من كل السيوف ... أثر إعلى أحسين حيل و ألمه
ا السيوف إعتنت تطلب دم حسين .... وهاي حاسبها لحسين إبمقدمـــه
بس بنات المصطفى حرى الجبود .... حسين حر وهاي للحر تلجمه
و عطش عبدالله التفرفح بين إيديه .. وكطع إكماطه ولعد مايك ومه
هاي بس وحدها صارت كُربلاء ... عالحسين وكربله من الشرذمه
أ آنه لو منك أودي ويا الطيور ماي ... خاطر منسأل ليش ولمه
لكن أنته إتريد تذنب يافرات ... وهاي ماتحتاج شرح أو ترجمـه
انفرط عقد الدين وجروفك تشوف ... وجان ممكن غرفه منك تلضمه
عطشيت الدين عن بكرة أبيه ... وكطعيت إزنود راعي الموزمه
تدري لو مايك وصل يم الخيام ... جاروى العباس منهم صارمه
وجان ماردت رؤوس إعلى الرقاب ... وجان ردت خيلهم تقطر دمه
إ شلون يمك طاح عطشان لحسين ... أو ماركض مايك أو يم جدمه أرتمه
طاعت إسماعيل صحراء الحجاز .... وإنت شح مايك لبن حماي الحمه!
ما أظن إسماعيل أكرم من حسين ... ولا أظن أمه اتقدم فاطمـه
ذاك أبن نبي و سأل ربه الجليل ... كيف تحيي الموتى وترد قائمه ؟
وهذا إبن حيدر علي سيف الرسول ... إلما يخاف إبدينه لومة لائمه
إ لكال لو ينكشف عن عيني الغطاء ... مايزيد إمن اليقين الفاهمـــه
يافرات أو تجري بعدك يافرات ...إلما يشوف الحق عسى إبعينه العمى
كلها ماتت خجل يانهر الفرات ... وإنت آخر شاهد إعلى الملحمة
كوم طم روحك حدر قبر الحسين ،... واعتذر لله واطلب مرحمة
كوم وغسل مايك برمل الحسين ... وخلي مايك يانهر يتيممه
وشوف فرق ال بينك وبين الكرام ... حسين شاف الدين عطشان إل دمه
ضحى بأخر قطرة من دم الشريف .... وظلت آخر قطرة ثورة وقائمة
حسين صافي و أصفى من ماي الجنان ... وإنته مايك طين وجروفك طمــه
حسين نبع الجود وإنت إسمك نهر ... ويانهر للمنبع أعطي وكرمه
لاجن أنت الحض عماك وتيهيت ... وسوء حضك راد إلك هالخاتمه
رحمك الله يا رحيم المالكي
وحشرك مع محمد وآل محمد